सव्‍वीस नोव्‍हेंबरपासून सारेच सुन्‍न भिन्‍न.
आपल्‍या, मानवतेच्‍या अस्तित्‍वाची क्षणभंगुरता मानवच बहाल करणार का ?
इतक्‍या थंड काळजाने अतिरेक्‍यांनी हे क्रौर्य कसे काय पार पाडले ?
बुद्ध, ख्रिस्‍त, गांधी...अनेक महामानवांनी शांतता, करुणेचे मानवाला साकडे घातले ;
लोकशाही जीवन व शासनव्‍यवहार जगाने मान्‍य केला ;
तरीही याला आवर पडू नये !
उलट नव्‍या सैतानी तंत्रशैली उगवू लागल्‍या आहेत.

ते तीन दिवस स्‍फोट, गोळीबाराचे अखंड ध्‍वनी टीव्‍हीतून मेंदूत दणाणत होते.
पण जाणिवा सुन्‍न.
हेमंत करकरे, अशोक कामटे, विजय साळसकर यांचे कापरासारखे दिसता दिसता उडून जाणे-
अजूनही नाही पटत.

करकरे केव्‍हाही टीव्‍हीवर पत्रकारांशी बोलताना दिसतील असेच वाटते.

पहिली रात्र टक्‍क जागी. दुसरी, तिसरी अर्धवट गुंगीत. उडालेली झोप अजून पूर्ववत नाही.

परवा शहिदांना अभिवादनाची सभा झाली, मेणबत्‍त्‍या घेऊन फेरी निघाली.
त्‍यातील सहभागाने गदगदण्‍याला, कोंडलेपणाला काहीएक निचरा मिळाला.

पण पुढचे धुके अजून विरत नाही.
म्‍हणूनच सुन्‍नता अजूनही ठाण मांडून.

रात्र चढत जाते

माळावर शुभ्र चांदणे
गडद होत जाते
पऱ्ह्याचा खळखळाट
शांत कल्‍लोळ
शमवित नाही

सकाळ होणे आवश्‍यकच आहे का ?

२२.८.३ 

१

धुके ओसरावे
हा अट्टाहास का ?

वृथा ही आस
अथांग दऱ्यांची !


२

आतुर सूर्य
नक्षत्रं धुंडत
आकाशमाळ हिंडतो

कृष्णविवराला भीत कसा नाही ?

२५.८.२००३

समुद्र
दुडदुडत्या पावलांना
खळाळत बिलगणारा

भन्नाट वारा घेऊन
आवेगाने
पदरात धुसमुसळणारा

दुखऱ्या जीवाला
सांत्वनाची
हळुवार गाज देणारा

प्रौढ चिंतनात
शांत विसावणारा

कलत्या संध्याकाळी
सरल्या स्मृतींत
रमणारा

समुद्र
सारे भाव सामावाणारा
समुद्रासारखाच

२३.८.३

रचलेल्या वनावरुन
ही झुळूक निघून जाईल;
जायलाच हवी

सोसाटा होणारच नाही याचा
कोणी द्यावा भरवसा ?

१७.१०.८

 
१

 
वाटा खोळंबून राहतात
बियास संथ होते
प्रपात स्तब्ध
देवदार गोंधळलेले


२

 
फुले कोमेजून जाणारच
का जपावीत ?
आजच्या कळ्या
उद्या उमलणारच
त्याही कोमेजणारच सायंकाळी
...म्हणजे आपण फुललेल्या टपो-या क्षणातच
सीमित व्हावे
असेच ना?

...मुकेशचे हे गाणे मनात गुंजत असतानाच 'व्हॅली ऑफ फ्लॉवर्स' मध्ये हा फलक सामोरा आला.
ऑगस्ट २००० मध्ये.
अजूनही तो रोमांच ताजाच.

१६.११.८ 

एखाद्या कोवळ्या सकाळी सिक्‍कीमचे तळे आठवते
सब्‍ध, शांत...
अथांग अवकाशाच्‍या घुमटात एक समाधीनाद भरुन राहिलेला
पंखांची चाहूल लागू न देता
एखादाच पक्षी अलगद उडत चाललेला.
...मन असेच हवे नाही ?
सिक्‍कीमच्‍या तळ्यासारखे